unhen kya ilm jo hum ko yahan samjhane aae hain
ki hum dair-o-haram hote hue maikhane aae hain

unhen bhi dekh aaen ek nazar mujh se farmaen
unhin par chhodta hun jo mujhe samjhane aae hain

hamein puchho surur un ka ki ye saqi ki mast aankhen
hamare zarf se nape hue paimane aae hain

agar aae hain naseh aaen lekin ye to farma den
samajhne aae hain khud ya hamein samjhane aae hain

badha chal shauq se ai ishq ke rahi ki is rah par
kahin basti bhi aaegi agar virane aae hain

mai-e-gul-gun hai saqi hai 'sahar' waiz se kahta hai
abhi farmaen mujh se aap jo farmane aae hain