unhin logon ki badaulat ye hasin achchhe hain
chahne wale in achchhon se kahin achchhe hain

kucha-e-yar se yarab na uthana hum ko
is bure haal mein bhi hum to yahin achchhe hain

na koi dagh na dhabba na hararat na tapish
chand-suraj se bhi ye mah-jabin achchhe hain

koi achchha nazar aa jae to ek baat bhi hai
yun to parde mein sabhi parda-nashin achchhe hain

tere ghar aaen to iman ko kis par chhoden
hum to kabe hi mein ai dushman-e-din achchhe hain

hain maze husn-o-mohabbat ke inhin ko hasil
aasman walon se ye ahl-e-zamin achchhe hain

ek hum hain ki jahan jaen bure kahlaen
ek wo wo hain ki jahan jaen wahin achchhe hain

kucha-e-yar se mahshar mein bulata hai khuda
kah do 'muztar' ki na aaenge yahin achchhe hain