us ka andaz bhi chehra bhi ghazal jaisa hai
wo padosi mera lagta bhi ghazal jaisa hai

dekhne walo ise meri nazar se dekho
ye mera chand sa munna bhi ghazal jaisa hai

dharm ke nam pe ye qatl ki sazish kuchh soch
tere hamsae ka bachcha bhi ghazal jaisa hai

husn aisa hai ki dekho to lage taj-mahal
is pe wo shakhs sanwarta bhi ghazal jaisa hai

pat-jhadon se bhi ubharti hain bahaaren 'ashiq'
rang mausam ka badalta bhi ghazal jaisa hai