us ka lahja karakht hota gaya
dil hamara bhi sakht hota gaya

zakhm ka ek nanha sa pauda
rafta rafta darakht hota gaya

tha safar yun to be-sar-o-saman
shauq-e-manzil hi rakht hota gaya

rahbari ka har ek alam-bardar
khugar-e-taj-o-takht hota gaya

teri khatir samet kar rakkha
dil magar lakht lakht hota gaya

ishq mein jis maqam se guzre
marhala aur sakht hota gaya

jis ne dekhe the khwab ujalon ke
wo 'sukhan' tira-bakht hota gaya