us shokh ko mail-ba-wafa dekh raha hun
kya baat hai ya-rab ye main kya dekh raha hun

dekhe to koi zauq-e-nazar ka ye tamasha
main parda-e-zulmat mein ziya dekh raha hun

har chiz haqiqat mein hai wabasta-e-markaz
har chiz ko markaz se juda dekh raha hun

is jalwe ne ehsan kiya jab se nazar par
har shai mein ise jalwa-numa dekh raha hun

har shakhs hai diwana yahan apni gharaz ka
ye kaisi zamane ki hawa dekh raha hun

jo shakhs hai firaun hai jo banda hai namrud
duniya mein hazaron hi khuda dekh raha hun

kya dekh raha hun ye kahun kya main kisi se
khud soch mein hun gharq main kya dekh raha hun

us shokh ki har baat dil-awez hai yani
har baat mein ek lutf naya dekh raha hun

malum nahin ishq kise kahte hain 'shaida'
dil mein magar ek hashr bapa dekh raha hun