use bhi laut kar aana nahin tha
wo jis ke samne rasta nahin tha

usi ke khwab dekhe ja rahe the
jise hum ne kabhi dekha nahin tha

hamara zahir-o-baatin mukammal
kisi ke ishq mein duba nahin tha

isi ummid par zinda the ab tak
masiha laut kar aaya nahin tha

saron ki bhid thi hadd-e-nazar tak
magar un mein koi zinda nahin tha

ghane pedon ki majburi to dekho
kahin bhi dur tak saya nahin tha