use tab dekhte shadab tha jab
wo sahra har taraf khush-khwab tha jab

khade khush-fealiyan karte the bagule
nadi mein ghutne ghutne aab tha jab

umidi sipiyan irfan si thin
samundar fikr ka payab tha jab

chamakti khushbuen thin machhliyon ki
jazira khwab ka dashtab tha jab

qadam khud se badhate the na raste
barasta chaar su kohrab tha jab

sabhi chehre ujala sochte the
hamari aankhon pe naqshab tha jab

thin ham-tabir 'rahmani' ki bahen
badan ham-khwab ka kamkhab tha jab