usi jannat jahannam mein marunga
gae mausam ko aawazen na dunga

nae jismon se maqtal jagte hain
nae logon ke raste par chalunga

meri aankhen salamat hain to phir main
parae khwab le kar kya karunga

lahu ki surkhiyan mere alam hain
khizan ke zard lashkar se ladunga

kisi khitte mein qatl-e-raushni ho
main apne shahr par nauha kahunga

aur us par jo sitam tutega us ko
tumhaare nam likkhunga sahunga