us ke hathon mein wo tasir-e-masihai thi
sukhte ped se bhi shakh nikal aai thi

zindagi bhar wo udasi ke liye kafi hai
ek taswir jo hanste hue khinchwai thi

kal to marne mein suhulat bhi bahut thi mujh ko
hijr tha raat thi barsat thi tanhai thi

mar gaya pyas se wo shakhs bhi ab hairat hai
jis ki dariyaon se barson ki shanasai thi

dekh lene ki suhulat to sabhi ko thi magar
chand hi aankhen thin jin aankhon mein binai thi