us ki gham-khwari karo aur us ki dildari karo
maslahat kahti hai tum dushman se bhi yari karo

kam se kam insaf ka daman na chhodo hath se
main kahan kahta hun tum meri taraf-dari karo

umr bhar sahte raho bakhshi hui sanson ka jabr
umr bhar duniya mein jine ki adakari karo

gir gai diwar-e-zindan kat gain sab bediyan
ab to ai ahl-e-junun elan-e-bedari karo

munsifo hum ne andhere ko andhera kah diya
ab hamare qatl ke ahkaam bhi jari karo

tark-e-mai-khana hai 'shair' waza-dari ke khilaf
jam khali hai to pine ki adakari karo