us ko hamari zat se inkar bhi nahin
lekin wo e'tiraf ko tayyar bhi nahin

roghan charagh-e-chashm mein jitna tha jal chuka
aur shahr-e-jaan mein subh ke aasar bhi nahin

be-kar dhundhte ho samaat mein khamiyan
pahli si ghungruon mein wo jhankar bhi nahin

do-chaar pal qayam ka kuchh to jawaz ho
kuche mein us ke saya-e-diwar bhi nahin

tujh ko sukhan-shanas ba-har-haal chahiye
'shadab' tera koi taraf-dar bhi nahin