us ne aate hi diya bujha diya
haal phir sara mujhe suna diya

mukhtasar se us ke ek tabassum par
jo kuchh bhi tha pas wo luta diya

be-sabri se padh gaya ek ek lafz
aur phir wo khat wahin jala diya

sar uthaya jis ne basti ke liye
us ke aage hum ne sar jhuka diya

sara din dariya kinare ret par
nam likha mera aur mita diya

muskura kar baat hi to ki us ne
logon ne is par tufan utha diya

is taraf us ne kabhi dekha na tha
aur jab dekha to but bana diya

hum khare sikke liye baithe rahe
us ne naqli note tak chala diya