us ne har mashq-e-sitam hum pe rawa rakkhi hai
hum ne aawaz bhi sine mein daba rakkhi hai

qatl-gahon mein lahu apna nichhawar kar ke
sham-e-insaf ki lau hum ne badha rakkhi hai

kahin bikhri hain kitaben kahin maile kapde
ghar ki haalat hi ajab hum ne bana rakkhi hai

apne wahshat-zada kamre ki ek almari mein
teri taswir aqidat se saja rakkhi hai

hum kisi baat ka shikwa na karenge 'kausar'
mohar honton pe khamoshi ki laga rakkhi hai