uth kar chale hain aaj tere aastan se hum
bezar ab hain bandagi-e-raegan se hum

ai dil har ek baat mein be-rabtiyan hain kyon
kuchh mutmain nahin hain teri dastan se hum

mayus-kun hai manzil-e-ishq-e-butan ka shauq
aa pahunche phir wahin ki chale the jahan se hum

dil ko to un ke lutf-o-karam ne mita diya
be-faeda ulajhte rahe aasman se hum

apni nigah-e-shauq bhi ab tak hai be-khabar
ai husn dhund kar tujhe laen kahan se hum

be-kaif tha fasana-e-ulfat magar use
chamka gae hain shokhi-e-tarz-e-bayan se hum

nakaamiyon ne gher liya dam pe ban gai
sab kuchh hua magar na dabe aasman se hum

dushman bhi dekh kar hamein hota hai ashk-rez
ye faiz pa rahe hain kisi mehrban se hum

'sahir' qafas mein hum ko ye azmat hui nasib
baala hain imtiyaz-e-bahaar-o-khizan se hum