uth kar tere dar se kahin jaane ke nahin hum
mohtaj kisi aur thikane ke nahin hum

thahra hai ayaadat pe safar mulk-e-adam ka
aane ke nahin aap to jaane ke nahin hum

jo tum ne lagai hai wo hai qadr ke qabil
is aag ko ashkon se bujhane ke nahin hum

lo aao suno hum se gham-e-hijr ki haalat
guzri hai jo hum par wo chhupane ke nahin hum

ahwal-e-shab-e-gham pe 'rashid' aaj wo bole
qail tere is jhute fasane ke nahin hum