uthi nigah to apne hi ru-ba-ru hum the
zamin aaina-khana thi chaar-su hum the

dinon ke baad achanak tumhaara dhyan aaya
khuda ka shukr ki us waqt ba-wazu hum the

wo aaina to nahin tha par aaine sa tha
wo hum nahin the magar yar hu-ba-hu hum the

zamin pe ladte hue aasman ke narghe mein
kabhi kabhi koi dushman kabhu kabhu hum the

hamara zikr bhi ab jurm ho gaya hai wahan
dinon ki baat hai mahfil ki aabru hum the

khayal tha ki ye pathraw rok den chal kar
jo hosh aaya to dekha lahu lahu hum the