utho gale se lipat jao phir nikhar lena
tamam raat padi hai banaw kar lena

ye lotna ye mera dard yaad kar lena
kabhi kabhi to kaleje pe hath dhar lena

hamare sath hai tera bhi imtihan ai tir
tadap ke dil jo nikal jae to jigar lena

dare to kat na sakega kabhi gala mera
yahi khushi ho to aankhon pe hath dhar lena

gunahgar pe yarab nuzul-e-rahmat kar
tera khazana jo khali ho mujh se bhar lena

'bahaar' roz ye kam-bakht munh ko aata hai
kidhar chala hai mera dil zara khabar lena