virana-e-hasti mein jo kal rah-numa tha
kyon aaj wo apna hi pata puchh raha tha

murjha ke bikhar jaana hi taqdir thi us ki
wo phul sar-e-shakh-e-tamanna jo khila tha

tha kucha-e-dildar mein ek sehr ka aalam
jo mujh ko nazar aaya wo apna sa laga tha

us ne hi meri fikr ko bakhshi hai hararat
ek aag ka dariya jo kabhi par kiya tha

wo baat na karta yahi behtar tha sar-e-bazm
is barf se lahje mein to ek shoala chhupa tha

hain yaad khad-o-khal na ab us ka sarapa
wo jis ki hatheli pe mera nam likha tha

be-wajh koi khud ko mitata nahin 'sajid'
marna hai agar kufr to jina bhi saza tha