visal-ghadiyon mein reza reza bikhar rahe hain ye kaisi rut hai ye kin azabon ke silsile hain mere khuda izn ho ki mohr-e-sukut toden mere khuda ab tere tamashai thak chuke hain na jaane kitni gulab-subhen khiraj de kar rasan rasan ghor amawason mein ghire hue hain sadaen dene lagi thin hijrat ki apsaraen magar mere panw dharti-man ne pakad liye hain yaqin kar lo ki ab na pichhe qadam hatega ye aakhiri had thi aur hum is tak aa gae hain