wadi-e-gham mein tere sath sath bhatak raha hun main
tujh ko meri talash hai aur tujhe dhundta hun main

hansta hun bolta bhi hun rota hun sochta bhi hun
pura mizaj-e-admi sab ko dikha raha hun main

itna hujum-e-admi hai ki hisab mein nahin
phir bhi gila hai aankh se kuchh nahin dekhta hun main

dekhta hun main waqiat silsila-e-taghayyuraat
sadiyon se wast mein bana shahr ka rasta hun main

mauja-e-gard-e-rah utha hasil-e-zindagi laga
qafila-e-hayat ki sai se aashna hun main