wafa-koshi nahin jati sitam-rani nahin jati
ye apni apni aadat hai ba-asani nahin jati

hijabon se haqiqat ki darakhshani nahin jati
ki lau fanus ke andar hai tabani nahin jati

junun-e-ishq ki ai dil farawani nahin jati
ki manzil samne hai aur pahchani nahin jati

nahin jati hamari khana-virani nahin jati
ki shoale bujh chuke hain shoala-samani nahin jati

tajahul aarifana un ka bazm-e-ghair mein tauba
ki pahchani hui surat bhi pahchani nahin jati

chaman mein raat bhar go baada-e-shabnam barasti hai
gul-o-bulbul ki phir bhi pak-damani nahin jati

kahan hum hain ki man-mani tumhaari man lete hain
hamari manne ki baat bhi mani nahin jati

nigah-e-husn hi kuchh kaam kar jae to mumkin hai
rafu karne se warna chaak-damani nahin jati

mukhalif kuchh karen urdu zaban mit hi nahin sakti
ki jab tak apni mahfil se ghazal-khwani nahin jati

mohabbat 'mauj' wo dariya hai jis ki thah mushkil hai
agar ek bar aa jati hai tughyani nahin jati