wafa-parast jahan-e-wafa ko le dube
ajib baat hai bande khuda ko le dube

ye kali kali ghata jo barasne wali hai
maza to jab hai kisi parsa ko le dube

safine ye to nahin hain jo hain kinaron par
safine wo the jo mauj-e-bala ko le dube

tamam ahl-e-nazara ki laj rakh legi
wo ek nazar jo kisi ki ada ko le dube

ye kaise kaise riya-kar hain zamane mein
saza ke nam se chaunke jaza ko le dube

baja hai shan-e-karimi ye sab ghurur magar
yahi ghurur to ahl-e-khata ko le dube

hamesha yaad hamin tak rahe hamare gham
wo dost kya jo kisi ham-nawa ko le dube