wahi shikasta cycle wahi udas zindagi
tere liye to kuchh nahin hamare pas zindagi

ye koh-o-dasht-o-rahguzar dhundte rahe tujhe
kise khabar ki hai kahan tera niwas zindagi

ajib masalon mein hai hayat-e-jawidan meri
yaqin la-wajudiyat magar qayas zindagi

tujhe to sabz jangalon ki rang-o-bu se wasta
teri giraft mein kahan ye sabz ghas zindagi

hamein bhi ghun laga gai umid-e-be-karan teri
tujhe bhi chatti rahi hamari aas zindagi