wahid parast ishq-ba-daman bana diya
kafir nazar ne hum ko musalman bana diya

ghunche ko gul to gul ko gulistan bana diya
zarre ko tu ne mehr-e-darakhshan bana diya

hum the faqat farishta hi banne pe mutmain
ye hai khuda ki den ki insan bana diya

dil de ke dil ko lazzat-e-gham de zahe nasib
khud dard hi ko dard ka darman bana diya

allah junun-e-ishq ki mojiz-numaiyan
iman ko kufr kufr ko iman bana diya

kis ne samet kar gham-e-kaunain ko 'sahar'
dil ko rahin-e-sozish-e-pinhan bana diya