wajud garche mera khak-e-mukhtasar se utha
mah-o-nujum ka halqa meri sharar se utha

badal gaya hai meri kisht-e-jaan kharabe mein
wo hashr jo ki teri chashm-e-fitnagar se utha

junun-e-shauq to har pal hai goya pa ba rikab
takan kahti hai ab paon ko safar se utha

sharab-e-wasl ki mad-hoshi hai rag-o-pai mein
asir-e-zulf ko ab husn ke asar se utha

na qata ki zarurat na ehtiyaj-e-qafas
yaqin hi jo parinde ka baal-o-par se utha

mah-o-nujum mere bakht par the rashk-kunan
ghubar ban ke main jab teri rah-guzar se utha

sawal-e-nazr-e-karam kya ki teri did ke baad
main be murad kahan tere sang-e-dar se utha

laraz ke rah gaya qatil bhi chand saat ko
jab irtiash mere jism-e-be-asar se utha

tamam umr rahi us ki justuju 'khawar'
jo dard ban ke kabhi dil kabhi jigar se utha