wallah ye husn us pe ye machla hua shabab
saghar sharab mein hai ki saghar mein hai sharab

zahid samajhta kya hai tu mere gunah ko
mera sawab masiyat tera gunah sawab

dil mein tadap nigah mein aansu labon pe aah
wallah kya mila mujhe saman-e-iztirab

han dekhna asar meri aah-e-sahar ka tum
khud sharm hi hataegi rukh se tere naqab

sab 'prem' zindagi ka yahi raaz ho to ho
jaise lab-e-bhanwar koi uthta hua habab