walwale jitne safar ke the safar itne na the
dur the raushan nagar hum se magar itne na the

band aankhen jab khulin to raushni pahchan li
be-khabar hum hon to hon par be-basar itne na the

maslahat ke hath ab apni ana bhi bik gai
be-sar-o-saman the pahle bhi magar itne na the

mustahiq aankhen meri jaanib uthi thin jis qadar
dukh to ye hai meri shakhon par samar itne na the

sath-e-chehra par bhi pahle ek thahraw sa tha
dil ki gahrai mein bhi 'mohsin' bhanwar itne na the