waqt-e-ghurub aaj karamat ho gai
zulfon ko us ne khol diya raat ho gai

kal tak to us mein aisi karamat na thi koi
wo aankh aaj qibla-e-hajat ho gai

ai soz-e-ishq tu ne mujhe kya bana diya
meri har ek sans munajat ho gai

ochhi nigah dal ke ek samt rakh diya
dil kya diya gharib ki saughat ho gai

kuchh yaad aa gai thi wo zulf-e-shikan-shikan
hasti tamam chashma-e-zulmat ho gai

ahl-e-watan se dur judai mein yar ki
sabr aa gaya 'firaq' karamat ho gai