waqt jab karwaten badalta hai
fitna-e-hashr sath chalta hai

mauj-e-gham se hi dil bahalta hai
ye charagh aandhiyon mein jalta hai

us ko tufan dubo nahin sakta
jo kinaron se bach ke chalta hai

kis ko malum hai junun-e-hayat
saya-e-agahi mein palta hai

un ki mahfil mein chal ba-hosh-e-tamam
kaun gir kar yahan sambhalta hai

main karun kyun na us ki qadr 'anwar'
dil ke sanche mein ashk dhalta hai