waqt ka kya hai taqaza nahin dekha jata
ishq mein adna-o-ala nahin dekha jata

ek hi waqt mein mil jae to pichha chhute
zindagi bhar ka sulagna nahin dekha jata

ye shab-o-roz ye mausam ye badalte manzar
raat-din ka ye tamasha nahin dekha jata

aaina dekh ke hum khud ko na pahchan sake
apne chehre ka bikharna nahin dekha jata

jaane haalat hamein aur dikhaen kya kya
nasl-e-nau ka ye bahakna nahin dekha jata

shoabada-baz siyasat se to baz aae hum
kya karen hum se dikhawa nahin dekha jata

'shauq' us khwab ki tabir mili hai aisi
ab koi khwab suhana nahin dekha jata