zindagi tera bol-baala hai
tujh se har samt hi ujala hai

tum kuen ke qarib baithe ho
hum ne sagar khangal dala hai

kis taraf se najat paun main
har taraf makdiyon ka jala hai

tujh ko kis samt khojne jaun
kahin masjid kahin shiwala hai

apni yaadon ki dijiye shabnam
zindagi aag hai jawala hai

apni nazron ko de ke aazadi
mustaqil tum ne dard pala hai

zist ko 'shauq' tum na samjhoge
is ka har bhed hi nirala hai