waqt ka pahiya chala aur raat gahri ho gai
sham aai din tala aur raat gahri ho gai

itna raushan tha badan main din hi rahta tha mudam
be-sabab hi dil jila aur raat gahri ho gai

aakhiri didar tha tayyar tha jis ke liye
aisa mushkil marhala aur raat gahri ho gai

jagne wale na the jo dekhte us ki chamak
nind sab ka mashghala aur raat gahri ho gai

main use kahne hi wala tha ujala tha abhi
kar bhala so ho bhala aur raat gahri ho gai

raat to pahle se thi jab bap sa suraj na tha
chand sa bhai dhala aur raat gahri ho gai

pi nahin sakte the pani dekh to sakte the hum
ek to ye karbala aur raat gahri ho gai

us taraf tufan aaya aur din lamba hua
hum par aaya zalzala aur raat gahri ho gai

sun rahe ho jaise hi abyaz ne 'aswad' se kaha
pur karo mera khala aur raat gahri ho gai