waqt ne ek nazar jo dali hai
phul ki tazgi chura li hai

aaj bhi us ne sham se pahle
dhup diwar se utha li hai

ab hawa chikhti phire shab bhar
shahr to sham hi se khali hai

maut bhi is liye nahin aati
zindagi zindagi se khali hai

hai mulaqat us se khwabon mein
aur ye taswir bhi khayali hai

ham-safar bhi naya bana lenge
rahguzar jab nai bana li hai

aaina gard se ata hai 'nawed'
aur be-chehragi misali hai