waqt qarib hai phir manzar ke badalne ka
suraj ki zid dekho ye nahin dhalne ka

main bhi talash-e-ab-e-hawas mein nikla hun
shor suna tha ek chashme ke ubalne ka

ahl-e-junun kyun dasht mein aana chhod diya
bhul gae fan nok-e-khar pe chalne ka

subh talak is shahr mein jaane kya ho jae
rishta dhundho raaton-raat nikalne ka

yaad-e-yar ka aa jaana bhi thik sahi
raaz magar gahra hai dil ke machalne ka