waraq waraq pe fasana bikharne wala tha
bacha liya mujhe us ne main marne wala tha

shagufta phul pareshan hua to gham na karo
ki wo to yun bhi hawa mein bikharne wala tha

main us ko dekh ke phir kuchh na dekh paunga
ye hadisa bhi mujhi par guzarne wala tha

pahad sina-sipar ho gaya tha mere liye
wagarna mujh mein samundar utarne wala tha

main be-qusur hun ye faisla hua warna
main apne jurm ka iqrar karne wala tha

umad pada tha jo sailab-e-hijr-e-tanhai
wo shahr-e-dil ko bhi gharqab karne wala tha