wijdan mein wo aaya ilham hua mujh ko
main bhul gaya us ko wo bhul gaya mujh ko

ab dub hi jaane de itna na gira mujh ko
sharminda na kar dale tinke ki ana mujh ko

main gum-shuda logon ki fehrist mein dab jata
wo to mere dushman ne pahchan liya mujh ko

is ahd mein kya rakkha tha jis pe basar hoti
kya hota jo wirse mein milta na khuda mujh ko

itni badi duniya mein kab se main akela hun
ai rabb-e-karim apne bandon se mila mujh ko