wo aa jae to mera shahr-e-dil aabaad ho jae
phir us ke ba'd wo mere liye sayyaad ho jae

kisi se ishq ka izhaar khamoshi bhi hoti hai
zaruri hai ki koi aadmi farhad ho jae

ajab hoti hai haalat jab kabhi ye dil machalta hai
kabhi ye shad hota hai kabhi nashad ho jae

jo honi hai muqaddar mein wo ek din ho ke rahti hai
gila kya kijiye duniya agar barbaad ho jae

sunahre khwab to dekhe magar tabir kab nikli
koi to aae din aisa ki ye dil shad ho jae

sitam ka din bhi lamba aur alam ki raat bhi lambi
bhala phir kyon na koi khanaman-barbaad ho jae

suna hai tum bhi koi aadmi the ek zamane mein
wo kya din the zara ahwal ai 'shahzad' ho jae