wo aankh mere liye nam hai kya kiya jae
use bhi aaj mera gham hai kya kiya jae

tere baghair kahin mera ji nahin lagta
tere baghair ye aalam hai kya kiya jae

sahar qarib hai ab kya wo aaenge milne
umid-e-wasl bahut kam hai kya kiya jae

khata maf khataen to hum se hongi zarur
ki ye to fitrat-e-adam hai kya kiya jae

ilahi ab koi chaara nahin dua ke siwa
mariz-e-hijr lab-e-dam hai kya kiya jae

wo mujh se milne ko aae hain meri maut ke baad
khushi bhi mere liye gham hai kya kiya jae

baraste rahte hain din raat hijr mein 'purnam'
ye haal-e-dida-e-pur-nam hai kya kiya jae