wo apne ishq mein kaisa kamal rakhta hai
ki be-rukhi mein bhi mera khayal rakhta hai

jo aaj mera nahin hai wo kal mera hoga
ki har zamana uruj-o-zawal rakhta hai

ajab nahin wo jahan-bhar ko bewafa samjhe
nazar mein meri wafa ki misal rakhta hai

kahan talak koi dast-e-karam ko zahmat de
tamam-shahr hi dast-e-sawal rakhta hai

meri udan ke aage hai kis qadar bebas
ye aasman jo sitaron ka jal rakhta hai

tera khayal hi kuchh mehrban hai warna
jahan main kaun kisi ka khayal rakhta hai

muqabil-e-saf-e-ada hai is tarah 'khawar'
ki tegh rakhta hai wo aur na dhaal rakhta hai