wo baad-e-saba rashk-e-chaman yaad rahegi
wo jaan-e-ghazal wajh-e-sukhan yaad rahegi

bebak se gesu liye makhmur nigahen
wo ghuncha-dahan sho'la-badan yaad rahegi

kuchh khauf-e-tamasha tha na ruswai ka dar tha
kitna thi wo chahat mein magan yaad rahegi

ek shauq-e-mulaqat mein hum so nahin pae
jagi hui raaton ki thakan yaad rahegi

jis ne meri rahon mein bade khar bichhae
ek dost bhi tha jis ki lagan yaad rahegi

main yaad rahun ya na rahun tujh ko zamane
lekin meri har tarz-e-sukhan yaad rahegi

kanton ki to fitrat hai gila un se nahin hai
mali tere phulon ki chubhan yaad rahegi