wo baat baat pe kahta hai bewafa mujh ko
sikha diya unhin baaton ne bolna mujh ko

main apni zat mein gum ho gaya tha sab se dur
teri nazar se mila hai mera pata mujh ko

haqiqaton se nazar kab talak churaunga
ki bar bar dikhati hain aaina mujh ko

wo chahta tha ki main us ki ek jhalak dekhun
main sochta tha kahin se wo de sada mujh ko

bhulae baitha tha jis ko main ek muddat se
na jaane kaise wo phir yaad aa gaya mujh ko

mere khilaf 'qamar' jaane kis ki sazish hai
banaya jata hai har roz masala mujh ko