wo dil jo kushta-e-gham-e-sud-o-ziyan na tha
shaista-e-nawazish-e-daur-e-jahan na tha

kab mujh ko lutf-e-ahl-e-mohabbat na tha nasib
kab mera dil mataa-e-gham-e-dostan na tha

juz teri yaad ke na thi dil-soz koi yaad
juz tere gham ke dil pe koi gham giran na tha

dil aur gham ke rabt ne majbur kar diya
yun warna har qadam pe kabhi imtihan na tha

wo mil gaya hai ab mujhe apni khabar ho kyon
thi us ki justuju to ye banda kahan na tha

tum to har ek husn ko pahchante ho khub
gul ki chatak mein kya mera husn-e-bayan na tha