wo dil ki jhil mein utra tha ek saat ko
ye umr ho gai hai sahte is malamat ko

kahin to saya-e-diwar-e-agahi mil jae
koi to aae kare khatm is masafat ko

tumhin se mil ke meri dil se aashnai ho
tumhaare baad hi jaana hai is qayamat ko

wo ek shakhs mujhe kar gaya sabhi se juda
taras raha hun main jis shakhs ki rifaqat ko

ajib log hain is shahr ke ba-nam-e-wafa
hawaen dete hain har shoala-e-adawat ko

jawaz bhi to koi ho meri tabahi ka
chhupa rahe ho tabassum mein kyon nadamat ko

gae dinon ka manate ho sog phir 'abid'
hamein yaqin hai na badloge apni aadat ko