wo ek bujhta hua sitara
wajud-o-hasti ka istiara

sulag rahi hai phir ek cigarette
dhuen ne phir koi rup dhaara

bhanwar nigalta raha safine
hansi udata raha kinara

sukut-e-shab ko kiya hai ghail
nadi mein patthar utha ke mara

udas rut ki hawa ne aakhir
ye ret par kis ka naqsh ubhaara

khala mein chakkar laga raha hai
bujhi hui aag ka sharara

ye duniya hone se thak chuki hai
ab us ki takhliq ho dobara