wo ek nazar mein mujhe pahchan gaya hai
jo biti hai dil par mere sab jaan gaya hai

rahne laga dil us ke tasawwur se gurezan
wahshi hai magar mera kaha man gaya hai

tha sath nibhane ka yaqin us ki nazar mein
mahfil se meri uth ke jo anjaan gaya hai

auron par asar kya hua us hosh-ruba ka
bas itni khabar hai mera iman gaya hai

chehre pe mere dard ki parchhain jo dekhi
bedard mere ghar se pareshan gaya hai

is bhid mein 'sarwat' nazar aane lagi tanha
kis kuche mein tera dil-e-nadan gaya hai