wo ek shor sa zindan mein raat bhar kya tha
mujhe khud apne badan mein kisi ka dar kya tha

koi tamiz na ki khun ki shararat ne
ek abr o baad ka tufan tha dasht o dar kya tha

zamin pe kuchh to mila chand uljhanen hi sahi
koi na jaan saka aasman par kya tha

mere zawal ka har rang tujh mein shamil hai
tu aaj tak meri haalat se be-khabar kya tha

ab aisi fasl mein shakh o samar pe bar na ban
ye bhul ja ki pas-e-saya-e-shajar kya tha

chatakhti girti hui chhat ujad darwaze
ek aise ghar ke siwa hasil-e-safar kya tha