wo gul-farosh kahan ab gulab kis se lun
nahin raha mera saqi sharab kis se lun

teri talash mein is umr-e-mustaar ke sal
jo raegan gae in ka hisab kis se lun

hayat khud hai sawal aur khud jawab apna
sawal kis se karun main jawab kis se lun

kisi ke nam jo mansub abhi nahin ki thi
main apni khoi hui wo kitab kis se lun

tumhaare baad na dekhun tumhaare jaison ko
to ye shaben ye umangen ye khwab kis se lun

nasha kisi se bhi le lun 'shuur' aaj magar
wo roz-e-abr-o-shab-e-mahtab kis se lun