wo hum honge sitam-garon se jo takrane aaenge sar-e-mahfil mohabbat ka sabaq dohrane aaenge wo mai jis ko samajhne ke liye pina pade hum ko hamein us ki haqiqat shaikh kya samjhane aaenge unhen lab tak na lane ki qasam tum ne to de di hai zaban-e-khalq par lekin wahi afsane aaenge sukun kis ka lutega kaun khush hoga sar-e-mahfil nahin malum wo kis par karam farmane aaenge farishton se khata hoti nahin insan se hoti hai suna hai is bahane shaikh bhi maikhane aaenge khud apni tang-zarfi se chhalak utthenge mahfil mein ba-waqt-e-mai-kashi aise bhi kuchh paimane aaenge shugun-e-nek hai mai-khane ka barbaad ho jaana naya saqi nae shishe nae paimane aaenge bahaar-e-gulsitan 'manzur' jin rahon se aaegi chhidakte khun pa-e-gul jhumte diwane aaenge