wo jhagde ka bahana chahta hai
mujhe phir aazmana chahta hai

wo rishta yun nibhana chahta hai
marasim ghaebana chahta hai

ayan hota hai khamoshi ke zariye
wahi jo wo chhupana chahta hai

wo jis ne har qadam sikha hai hum se
wo ab hum ko sikhana chahta hai

wo ziddi hai kisi bachche ki surat
thaharta hai na jaana chahta hai

jo bhadkai thi us ne nafraton se
wo jumlon se bujhana chahta hai

bahut masum hai mahbub mera
ki haare ko harana chahta hai