wo jo sab kuchh hai use dur bitha rakkha hai
khwahishen hain jinhen mabud bana rakkha hai

kuchh to hai tirgi-e-dil mein ujale ke liye
tu nahin hai teri yaadon ko bula rakkha hai

har koi apne hi partaw mein hai sargarm-e-safar
main ne mahaul ko aaina dikha rakkha hai

us ka baatin bhi hai khurshid-e-qayamat ki tarah
ye jo ek taq mein chhota sa diya rakkha hai

ek lahza meri tanhai mein aa kar dekho
main ne zindan mein bhara shahr basa rakkha hai

sar-e-darbar jo puchho to mera jurm hai ye
main ne kyon shahr mein aankhon ko khula rakkha hai

kabhi do bol mohabbat ke bhi ai jaan-e-'safi'
jab bhi dekho tere honton pe laga rakkha hai